شايقي في الغربة

[b]بسم الله الرحمن الرحيم
شايقى في الغربة
الشايقى قام من الفجر
اذانو نادي علي الفلاح
سوك خشيمو مع الوضو
وفي الركعة سرح في البطاح
في الدنيا والهم الكبير
في الناس وفي حلة ملاح
أم العيال داير الذهب
والبت زواجه معادو راح
والود مدرس في المسي
شان يلقي للجامعة النجاح
وقطر الهموم ما بتلحق
سواقوا ما بديك براح

والشايقى سواق للبنات
في النقل للناس الملاح
والراتب الممسوخ تقول
غزل البنات في لحظة راح
وعز العرب عز العجم
في الغربة ما لاقي اليقين
فرق العيال نار الجحيم
إلا الفلس ما ليه دين
والشايقي في كربة وسهر
بين الريال والقفة
والهم السمين
شوق للبلد كاويه كي
والنوم مجافي مع الأنين
يرحل يسافر في الخيال

للنخلة ترقص في الهبوب
والساقية والثور الحرون
والجلسة في شاي الصباح
وقولة سلام من كل لون
عوافي يا ناس البلد
أهلا حبابك يا الحنون
عوافي لي ضل الضحى
للدومة للكراب
لي العيش للسكون
عوافي للبركل عموم
لي نورى لي تنقاسي
للناس للفنون
عوافي لي مروى الجديد
للغابة للمقل العيون

عوافي لي كل الديار
ألفيها شوق الشايقي
اتشابك غصون

عوض موسى فضل السيد
الرياض/24/3/2010م

[/b]

القصيدة رائعة لك التحية وكل التقدير

شاعرنا الغالي عوض

تقبل تحياتنا